Plattdeutsche Nachrichten

De Plattdüütschen Narichten vun'n 12. Januar 2018

Plattdüütsch Narichten vun'n 12. Januar 2018, [3:26]

In Berlin sünd se woll op een Brett kamen

Berlin – De Böversten vun Union un SPD wüllt woll een nee’e Grode Koalitschon henkregen. Nahden se mehr as 24-Stunnen snackt hebbt, hebbt sik Merkel, Seehofer un Schulz darop eenigt, ehrn Parteien den Ratslag to geven, vun’t Amts wegen mit Koalitschonsverhanneln antofangen. Man de Grupps, de achter jem staht, mööt noch „Jo“ darto seggen. Dar ward vermellt, Union un SPD harrn sik ünner annern darop verstännigt, dat Arbeitgever un Arbeitnehmer wedder gliek veel in de Krankenversekerung tahlt. Opstunns mööt de Arbeitnehmer mehr Geld tahlen. Buterdem wüllt Union un SPD woll nich de Stüern nah baben setten.

Trump beleidigt afrikansche Staaten un Haiti

Washington – US-Präsident Trump hett woll heel nich nett över Towannerer ut Afrika un Haiti snackt. As se över een nee’et Gesett to’n Inwannern verhannelt hebbt, schall Trump fraagt hebben, woso so veele Minschen ut „Dreckslock-Lännern“ in de USA kummt. Dat hett he woll Wurt för Wurt so seggt. Dat schrievt mehrere Zeitungen un weet dat vun Lüüd, de darbi ween sünd. Dat Witte Huus hett ok nich vermellt, dat he dat nich seggt hett.

Verfatenschutz tellt jümmer mehr Rieksbörger

Berlin – De so-nöömten Rieksbörger ward in Dütschland jümmer mehr. As de „Focus“ vermellt, hett de Verfatenschutz to’n Beginn vun’t Johr rund 15-dusend Minschen tellt, de sik sülfst Rieksbörger nöömt. Vör een Johr weern dat noch üm un bi 10-dusend. De Rieksbörger kennt de Bunnesrepublik as Staat nich an. De Verfatenschutz hett jem op’n Kieker, wiel ünner jem ok Lüüd sünd, de een heel rechtsradikale Meen hebbt.

Perzess wegen Scheteree in Ollenborg fangt an

Ollenborg – Vör dat Landgericht mutt sik siet den Vörmiddag een 38-jöhriger Mann wegen Dodslag verantwurten. He schall an’n Enn vun’n Juli in een Ollenborger Firma een Mann ümbröcht un een annern swar versehrt hebben, wieldat he op jem een paar mal schaten hett. Bi den Fall hebbt se in Ollenborg orrig nipp un nau henkeken, wieldat de Sporen woll to de Rocker henföhrt. De Dode weer de Unkel vun een ehemalig Hells-Angels-Littmaat, dat kort vör de Scheteree verswunnen is un jümmer noch misst ward.

IG-Metall lawayt in’n Norden wieter

Bremerhaben – De IG-Metall sett in de norddütsche Metall- un Elektroindustrie kümmer mehr Streiks to’n Wahrschaun in’n Gang. De Gewarkschupp hett de Arbeiters vun rund 70 Bedreven opropen, de Arbeit för een Tied liggen to laten. Laways sünd ünner annern in Bremerhaben bi de Lloyd-Warft un de Windanlaag-Firma Senvion plaant. De IG-Metall foddert söß Perzent mehr Geld un dat Recht op een körtere Arbeitstied. De Arbeitgever hebbt bitnu twee Perzent anboden.

Dat Weer

Un nu een Blick op dat Weer: in Osterholt-Scharmbeck un an de Fischereehabenslüüs in Bremerhaben 2, an’n Bremer Fleegerhaben un op Wangerooge sünd dat opstunns 3 Graad. Hüüt is dat meist överall gries un dar fallt ok mal Sprütteregen, man meist blifft dat dröög bi 3 bit 5 Graad. Tokamen Nacht ward dat wieter faken dull wulkig, man dat spüttert meist nich mehr. Dat Thermometer sackt op 3 bit 2 Graad. Morrn geiht dat gries un mit Daak wieter un de Sünn kiekt egens nich rut. Dat blifft aver mehrstendeels dröög bi 2 bit 4 Graad. Sünndag ward dat nah Nevel fründlich bit wulkig un dröög bi 1 bit 4 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Heidi Jürgens.